家庭玫瑰經接待家庭 - 馮榮達及衛瑞笙伉儷
衛：劉神父，各位主內兄弟姊妹，早晨，好多謝教友年籌委今日俾機會我哋喺呢到分享上年十月聖母玫瑰月家庭頌經嘅點滴。馮：當你知道要做接待家庭嘅時候有咩反應？
衛：當時我真係有啲不知所措，但都有少少興奮，興奮就係聖母能夠親臨我地屋企，使我地可以近距離接觸聖母，睇清楚佢慈祥嘅容貌，又可以長時間同佢傾計。不知所措嘅就係我地恭迎聖母回家，又要點安放好佢呢？於是我就問一問我先生。
馮：其實都唔需要擔心，我地屋企有個半身柜，只要稍作收拾，我諗聖母應該住得幾舒服嘅。另外我太太又買咗啲玫瑰花襯托，咁好快就佈置好。
衛：安放咗聖母之後，成間屋即刻生色唔少，仲多咗份祥和喺我就哋家庭中間，同埋唔知點解成日都好想望下佢，我個小朋友都話佢面容好祥和，令我地諗起劉神父講過，聖母嘅臨在會保祐你家庭。
馮：咁你記唔記得嗰日有本小冊子，入面有啲經文禱文，仲有聖詠。
衛：係呀，我地成家都參與咗呢個對聖母嘅敬禮，我係讀經員，咪負責返經文部份囉，你都要讀到一部份架，咁兩個小朋友就喺唱聖詠嘅時候幫大家伴奏。成家都有唔同嘅工作，都幾窩心架。
馮：咁你又記唔記得個日神父同其他教友一齊嚟唸玫瑰經呀？個種溫馨同喜樂，真係筆墨難以形容。
衛：你睇返個日影啲相都知啦，諗起都開心。真巧合，當我哋接到這個活動後，一個好久沒見的本堂讀經兄弟忽然來電，於是我就邀請他來參與我們的家庭玫瑰經，點知佢又得噃，你話呢 啲係唔係聖母顯示嘅果種共融。
馮：個晚祈禱完咗之後，成班兄弟姊妹開懷暢聚，都係多得有聖母嘅臨在。玫瑰經不但團結咗家庭成員，也都融入咗堂區呢個大家庭，發揮兄弟姊妹間共融同互為代禱嘅精神。
衛：所以兄弟姊妹們，今次對於我哋嚟講都係一個好美好嘅回憶。希望你哋都能夠讓聖母到訪你地嘅家庭，感受一下佢臨在帶嚟嘅和諧、平安同喜樂。多謝！主佑！