新教友 - Judy
劉神父您好/早晨，主內既弟兄姊妹您哋好/早晨：我叫方小慧 JUDY，係今年新領洗既教友，星期日黃鎮國黃SIR既學生。雖然我係新入教，但係打從中學年代，我就開始接觸天主教。每當我遇到不如意，又或有野所求時，好自然我就會祈禱。喺咁多年既生活當中，的確遇過的確遇過大大小小好多問題，但憑住呢個信仰，我會相信否極泰來。
黃SIR揀咗我黎同大家分享我領洗既感想，只因可以用四個字黎形容整個過程，就係多災多難，又或講得正面d，就係充滿刺激﹗
二月廿六日嗰朝，我一早起身諗住洗靚個頭，去出席當日既甄選禮，交領洗申請信俾劉神父，點知洗到一半既時候，我大仔大嗌爸爸，原來係廚房爆水管﹗閂到大掣後，先安排我兩個仔自己出門返主日學，乘機將佢地交俾天父照顧，而我同我先生喺屋企不停咁拖地同筆水。我打電話俾我慕道班戰友KANDI，希望佢先生可以介紹相熟既師傅黎睇睇，結果，佢先生親自過黎幫我睇。每次我屋企有咩頭暈身慶，佢都會第一時間黎幫手既。 經佢檢查過後，講咗個好消息我哋知，佢話沖涼方面冇問題，廚房部洗衣機洗衫亦都冇影響，就只係廚房鋅盤個水龍頭唔用得。感謝天父﹗今次我仲唔攞正牌唔洗煮飯？﹗ d水筆得七七八八之後，我只係略略清潔吓就換套衫趕返黎教堂，左撲右撲，喺我大仔手中拎返封領洗申請信。好彩最後都總算趕得切出席綵排，更喺儀式中親自將信交到劉神父手中。
我以為咁都已經夠驚險啦，原來都仲未算﹗
四月七號，領洗嗰日，因為兩個仔既踢波教練安排咗家長友誼賽，機會難逢，於是我先生都有去參加。三點鐘開始比賽，踢到四點鐘既時候，可能因為我先生太落力既關係，結果跣一跣腳，跌甩左手手胶。 其他家長打電話叫救謢車，我個心就喺度盤算之後既時間點安排呢，因為距離光之典禮既綵排只有三個鐘頭左右，我到底可以點做呢？
四點半鐘，救護車送佢入廣華醫院， 我就帶住兩個仔先返屋企梳洗。 五點半我趕到去廣華醫院，我先生開始接受治療。大半個鐘頭後，通知我入去拎走我先生身上既貴重物品，原來啱啱幫佢打過麻醉針黎托返個手胶，所以佢未清醒。男護士叫我先離開，等到我先生藥力過咗會幫佢打埋石膏，到時會再聯絡我去醫院接返佢。我既回覆非常簡潔，就係：冇十一點我都返唔到去醫院，更加聽唔到電話﹗我估個男護士都好少見到有我咁絶情既太太﹗我真係咁絶情？梗係唔係﹗只係太趕，唔想多解釋啫﹗
六點半離開醫院，一個鐘頭內已經返到屋企食完外賣，再換套衫，趕到黎綵排，但都比原定時間遲咗。估唔到既係全場靚位已經冇晒，我要安排到我兩個仔坐到比較後既位置。 綵排期間，我同足球隊一位家長 ─ 彭彩燕姊妹，講返我先生既情況後，佢好快就幫我d仔換咗個，我心目中認為睇領洗既理想位置俾佢地坐，即係中間通道前，近入口既位置，令佢地可以坐得前d，多d熟人照應，好多謝佢當日既幫忙。 八點正儀式開始，其實我個心都仲好亂。由諗住唔洗拎手袋，到最後仲要拎兩個人既隨身物品，非常輪盡，完全失晒預算。期間聽到星期六慕道班RENNIE既分享，佢多次提到「天主自會照料」，到底天主係咪真係會照料？ 為左領洗而置我先生於不顧，唔多唔少我都有D內疚。臨領洗前先發生呢件意外，到底係咪天主想考驗我，要我諗清楚係咪真真正正相信佢先去領洗呢？ 要走都仲黎得切，不過，我而家可以喺呢度同大家分享，大家當然都知道答案啦﹗我最後決定義無反顧﹗
當我擰轉身準備跟各候洗者步向領洗池既時候，嗰刻我真係好愕然﹗我竟然見到我先生同兩個仔一齊企喺遠處，睇住我慢慢行過去領洗池﹗唔需要等到十一點就可以見到佢喎﹗ 領洗嗰一刻，我既家人都能夠近距離一齊為我見證，一時感觸，令到我終於忍唔住默默咁喊咗出黎﹗原來天主不單只會照料，而且更幫我妥善安排好一切。我確信天主一直都有眷顧我，一切一切都只係天主對我信仰上少少既磨練，為既係要讓我知道，天主對我哋既愛毋用懷疑。
最後我想多謝黃sir，同我一班慕道班同學。喺班上，我哋有笑過，有激動過，更有喊過，大家既感情都好好。(佢地今日仲坐喺最前排，專登為我打氣，幫我壯膽。)希望以後唔洗剩喺whatsapp或facebook度傾，每星期繼續喺呢度見﹗我好開心可以以教友身份正式加入呢個大家庭。希望大家都同樣歡迎我哋呢班新教友。
主佑各位。