神父、各位教友，大家好，我叫做 Raymond，係男士會嘅副會長，今日好高興能夠喺這裏同大家分享。想起最近堂區主保瞻禮的話劇，自己能夠扮演“龍哥”一角，真係好開心，如果你們想睇這齣福傳話劇，可以上堂區網頁重溫。記得當初 Louis 叫我扮演黑社會大佬 “龍哥”，我一口就答應咗。當時我覺得可能 Louis 搵唔到人幫手，我係這個堂區的一份子，如果我都推卻唔做這個福傳話劇， Louis 可能會好失望，其實自己膽粗粗應承咗做，都有些擔心，因為老婆時時都話我無記性，如果上到舞台先至唔記得晒Ｄ台詞，真係好失禮，好在 Louis 連續幾個星期日都同我們綵排，又教我地D語氣、做手，怎樣去表達，最後先至能夠順利完成這齣福傳話劇，其實我真係要多謝 Louis 訓練我地D說話語氣，我老婆話我最近好好戲喎，話我最近講嘢D語氣都唔知邊句係真話，邊句係假。
其實我自小早已經得到天主的照顧，我喺三歲嘅時候父母已經分開咗，我細細個被安排喺一間基督教聖公會學校裏面寄宿，所以我好細個已經認識天主，每日食飯前要禱告，逢星期日返主日崇拜，見到D大人行埋祭台前面，跪拜領聖體聖血，當時我都係矇查查，唔知點解大人要咁做，後來至知原來佢地係同耶穌基督親切咁結合，共融一體。
其實我真係感覺到天父喺這幾拾年來，一直喺我身邊帶領着我，每當我犯錯，天主會比一D深刻的經驗同教訓我，使我覺悟，比機會我重新改過，我有困難的時候，衪會找人幫我，我又曾經生意失敗，後來體會到原來天主係唔想我工作太過辛苦，那時日做夜做，忙到連去親近天主都無時間，當時甚至問天主可唔可以比我休息下，原來天主一早已安排我另外一樣工作，現在還可以有時間為天主嘅兒女及堂區教友服務，依家生活真係好開心，生活同工作完全無晒壓力，感謝天主給我最好的生活方式。
我記得我二哥得到腎衰竭病的時候，當時自己都唔知點樣可以幫佢，唯有時時祈禱，估唔到大約一個月後，我認識咗一位教友，佢原來係醫院腎科醫生，經過佢嘅幫忙，我二哥好快就得到醫冶，免卻我們一家人的擔心，雖然我二哥最後都因為 ”腎衰竭” 而過世，但係都將佢嘅生命廷長咗十多年，能夠看着兒女長大成人，最後才返去天父的家，真係感謝天主賜比佢這份恩寵。
另一樣我得到天主照顧嘅係，我因為從小沒有見過母親，甚至連相片都未見過，只知父愛，而未嘗母愛，所以當我長大後，心裏其實真係希望有日能再見到她一面。所以當父親過身幾年後，內心又再思念起母親， 雖然同母親分開幾拾年，完全唔知佢嘅音訊，但還是嘗試再尋找她及登尋人啟事，亦多次向天主禱告我嘅心願，想不到兩、三個星期後，失散幾拾年的母親，能夠再次相認，真係多謝天主的照顧，所以我真係感覺到天主時時都在我身邊聽我嘅禱告。
最後，祈求主好似照顧我一樣，親自保守和帶領每一位教友，主佑各位！